03-017
華倫夫婦「狼人」事件補完計劃
Note: This post is written in Cantonese and
there is no translation of it.
超自然現象調查者華倫夫婦，佢哋一生曾經調查過嘅超自然事件超過一萬宗，而當中嘅著名案件，「維基百科」就列出咗九宗。
華倫夫婦
Image Source: Wikipedia
喺之前嘅貼文入面，我已經介紹過，當中嘅七件案件，都起碼有一次被改編成電影或電視劇，為免麻煩，要大家睇返之前嘅文，我而家用中文再列多一次出嚟畀大家參考：
- 「安娜貝爾事件」（《詭娃安娜貝爾：造孽》、《詭娃安娜貝爾》、《詭娃安娜貝爾：回家》）
- 「羅德島鬼屋」（《詭屋驚凶實錄》）
- 「阿米提維爾鬼屋」（《黎明》、《阿米蒂維爾謀殺案》、《靈異鬼現》、《靈時3點3》、《詭屋驚凶實錄2》、《鬼殺人》、《魂銷魄散》、《陰宅：惡靈甦醒》）
- 「恩菲爾德騷靈事件」（《凶宅異聞錄》、《詭屋驚凶實錄2》）
- 「夏恩·強生」（《惡魔謀殺案》、《詭屋驚凶實錄3：魔旨》）
- 「康乃狄克鬼屋」（《鬼影森森：康涅狄格鬼屋事件》、《康州驅魔實錄》）
- 「斯穆爾家庭」（《鬧鬼》）
註：以上戲名同電視劇名盡量採用香港譯名，揾唔到先用台灣或內地譯名。
華倫夫婦有將佢哋嘅調查記錄出版成唔同嘅書，但係對於一個有兩個小朋友嘅爸爸，真係冇乜時間睇書，所以要了解呢啲案件嘅詳細情況，改編作品幫到我好多。
不過，依然有兩件華倫夫婦嘅著名案件係未被改編成熒幕作品嘅，佢哋就係「狼人」同「康涅狄格州伊斯頓聯合公墓」事件。冇電影或電視劇睇，唔通一定要睇書？
都唔一定嘅，改編作品唔一定要係熒幕作品，改編可以係話劇、漫畫，甚至冇影象都得，例如廣播劇，又或者錄音節目。咁啱我好鍾意嘅錄音節目《迷離公路》，就有一集講華倫夫婦嘅「狼人」事件，特別介紹畀大家。
唔知溫子仁嘅《詭屋驚凶實錄宇宙》將來會點發展，我希望佢會拍埋剩低嗰兩個案件，又或者會重制返「康乃狄克鬼屋」同「斯穆爾家庭」，但係喺未有進一步消息前，聽吓 Herro 嘅《迷離公路》，都可以叫做補完返華倫夫婦部份嘅 open cases，希望大家喜歡。
No comments:
Post a Comment